Ang coronavirus nga covid-19 taas kaayo ang risgo niini sa mga katiguwangan pero lahia kining madre sa Pransya. Si Lucile Randon 117, o naila sa pangalan nga Sister André wala siya masayod nga nataptan na diay siya sa makuyaw nga virus.
Iyang gisaysay sa reporter sa BFM ang iyang kasinatian nga sama lang daw sa naandan nga kapoy kaayo siya. Pero dugang niya nga morag nasakit siya tungod sa tumang kakapoy. Sa dihang gipangutana siya kung nahadlok ba siya sa virus, ang iyang tubag - wala, kay wala daw siya mahadlok mamatay.
Niadtong Enero 16, 2021 nagpositibo siya sa coronavirus didto sa iyang retirement home sa Toulon - sa habagatang bahin sa Pransya. Gibulag siya sa ubang residente nga wala'y nakitang sintoma kundili ang kakapoy lamang. Matod sa mga taho, napulo ka mga residente ang namatay sa iyang gipuy-an diin 81 sa 88-90 ka residente ang positibo sa makatakod nga kagaw. Pebrero 8, gikataho nga nakalingkawas siya sa virus.
Nagsaulog siya sa iyang ika-117 adlaw'ng natawhan niadtong huwebes, Pebrero 11, 2021. Si Sister André natawo didto sa Alès, Gard niadtong tuig 1904. Ang iyang kambal nga igsoong babaye namatay pag-abot sa 18 ka bulan.
Sa edad nga 19, gibiyaan niya ang iyang protestanteng pagtoo diin ang iyang apuhan sa amahan, pastor. Nabawtismohan siya sa Katoliko sa pangidaron nga 27. Sa pag-abot niya'g 40 anyos nisulod siya sa Company of the Daughters of Charity ug dinhi pod nagsugod siya paggamit sa pangalan nga "André" gikan sa iyang maguwang nga lalaki.
Nagtrabaho siya isip usa ka magtutudlo ug gouvernante sa mga lain-laing pamilya. Usa sa iyang gidumala ang pamilyang Peugeot, tiggama og mga awto. Sa ikaduhang kalibutanong gubat nagbantay siya'g mga bata. Pagkahuman sa gyera nagtrabaho siya 28 ka tuig sa hospital sa Vichy para sa mga ilo ug tigulang.
Pagkahuman niya sa hospital nipuyo siya'g tulo ka dekada didto sa usa ka nursing home sa Savoie dayon pagka 2009 sa edad nga 105 sa retirement home sa Toulon.
Segun sa Gerontology Research Group, usa ka pangkalibutanong grupo sa mga researcher nga nagsubay sa mga supercentenarians - mga tawo nga nagpangidaron og 110 pataas, si Sister André ang pinakatigulang nga tawo sa mga nga naay relihiyosong katungdanan. Nisaka sa numero uno iyang ranggo dihang namatay niadtong Hulyo 13, 2017 ang nag-una sa listahan nga si Sister Cecilia o sa tinuod nga pangalan - Marie-Josephine Gaudette sa pangidaron nga 115 ka tuig ug 110 ka adlaw.
Sa Pransya nga rekord matod sa research group, nag-una si Sis. André sa listahan sa mga labing tigulang nga tawo nga buhi. Sa rekord sa tibuok Europa siya usab ang pinakatigulang nga buhi dihang namatay si Maria Giuseppa Robucci nga taga Italya sa pangidaron nga 116 ka tuig ug 90 ka adlaw niadtong Hunyo 18, 2019.
Sa kalibutanong rekord ikaduha sa pwesto si Sis. André sa mga pinakatigulang nga buhing tawo. Gihuptan ni Kane Tanaka usa ka hapones ang unang pwesto sa edad nga 118.
Niadtong ika-115 nga kasaulogan sa iyang adlaw'ng natawhan gipangutna siya sa Radio France unsa iyang sekreto sa iyang taas nga kinabuhi, iyang tubag " Wala ko'y mga sekreto, tulo ko ka beses namatay ug tulo usab ko nakagawas sa kamatayon. Wala kita'y nahibaw-an ngano o giunsa. Akong kambal nga babaye aksidenteng namatay dihang 18 ka buwan, nianang panahona nagkabulag kami, matag usa sa balay sa usa ka yaya. Sa akong tan-aw gusto sa Maayong Diyos nga pulihan nako ang mga adlaw nga wala siya mabuhi.
Dugang kasayuran: https://www.franceinter.fr/societe/soeur-andre-a-115-ans-aujourd-hui-et-deux-souhaits